(Kining maong sugilanon mananaog sa Ikaduhang Ganti sa Lunsayng Bisaya Tigi sa Sinulatay 2008. Mga maghuhukom: Bisaya Associate Editor Edgar S. Godin, Bisaya Staff Eleazar T. Acampado ug Bathalad-Mindanao Hall-of-Famer Marcelo A. Geocallo.)
May laing paagi nga nahunahunaan si Ingko Estong aron kabayran ang dugay na kaayong utang sa kabubut-on…
NAGHINANGAT na ang pista sa dakong barangay sa Sta. Monica nga sakop sa usa ka lungsod sa habagatang Sugbo ning bulan sa Mayo. Ang katawhan isgot nga nanaglimpiyo sa ilang kabalayan ug kaliyongan. Sa plasa sa barangay duol sa nahimutangan sa simbahan, may gimontar nga perya nga nagsugod na paglingaw sa mga lumulupyo matag gabii. May ferris wheel, may carousel sa mga kabayo-kabayo ug shoot the ball. Kon gusto kag sugal, dunay bingo, holdam, bulitse ug hantak. Naa say tolda sa mga salamangkero kun madyikero ug tolda sa manghihimalad. Daghan usab ang manulod sa tolda sa babayeng baki nga ang lawas porma gyod og baki gawas sa iyang ulo. Didto usab sa sports complex, may liga sa basketbol nga giapilan sa mga team gikan sa mga silingang barangay sa Sta. Monica. Alegre usab didto sa bulangan diin mag-abot ang mga sabongero uban sa ilang mga manok-igtatari matag Miyerkoles ug Domingo. Ang patron sa maong barangay mao ra sab si Sta. Monica. Bibo gayod ang pista sa maong barangay.
Apan ang gikahinaman sa tanan mao ang lumba sa bisikleta. Ang mga lumulupyo lamang sa lungsod diin mahisakop ang Sta. Monica ang makaapil niining lumbaa. Si Atty. Anas Dikan, ang mayor sa lungsod sa taga Sta. Monica maoy nagpasiugda niini mga tulo na ka tuig ang nakalabay, mao poy mohatag sa mga ganti alang sa mga mananaog. Himoon kini sa adlaw gayod sa pista. Ang ruta sa lumba anha magsugod sa plasa sa sentro sa barangay diin mahimutang ang barangay hall ug ang health center. Dayon, ang mga siklista mopaingon ngadto sa unang barangay sa norte nga sakop sa lungsod ug molahos sa kataposang barangay sa habagatan nga sakop gihapon sa lungsod, unya mobalik sa sentro sa barangay sa Sta. Monica.
Ang kasamtangang kampeyon sa lumba sa bisikleta mao si Ingko Estong, usa ka hamtong nga biyudo nga may bugtong anak nga babaye, si Dayana, nga atua na manimuyo sa Dakbayan sa Sugbo uban sa nabana niining abogado ug usa ka anak. Nadaog niya ang dungog sa miaging tuig kanus-a gilupig niya sa sinikaray sa pedal si Meloy, usa ka batan-ong siklista nga, matod pa sa taga Sta. Monica, may purohang mahimong kampeyon sa Tour of Cebu. Si Noy Elik, ang defending champion niadtong higayona, igo dang nakakuha sa ikatulong puwesto. Si Ingko Estong ug si Noy Elik katalirongan sa edad nga kuwarenta apan lig-on pag mga lawas tungod kay hilig nila ang pagbisikleta isip usa ka paugnat sa kusog. Gani, nakaapil na sila sa Tour of Cebu niadtong mga batan-on pa sila. Diha ganiy tuig nga si Ingko Estong midaog sa ikatulong dapit samtang si Noy Elik dinha sa ikalima. Sanglit lumad nga taga Sta. Monica, sila maoy pambato sa lungsod matag higayon nga adunay lumba sa bisikleta sa lalawigan. Mga beterano na sila sa lumba sa bisikleta.
Sa mga batan-ong siklista, may duha nga mitumaw sa natad. Si Meloy nga nakakuha sa ikaduhang dapit sa miaging tuig ug si Bartolo nga maoy nakailok sa ikaupat nga dapit. Usag usa niining duha nanganti nga karong tuiga mao ang mamahimong kampeyon. Gani, gara kaayo silang moyagayaga o mabugalbugal ngadto nilang Ingko Estong ug Noy Elik nga ‘wa nay lana, lunok na lang’. Si Meloy ug si Bartolo kanunay nang nagpraktis. Uban sa mga batan-ong buot mangapil sa lumba, ila nang gisulayan paglatas ang gilay-on gikan sa sentro sa Sta. Monica paingon sa norte sa lungsod dayong balik lahos ngadto sa habagatan, unya balik sa sentro sa barangay. Sa laing bahin, sila si Ingko Estong ug si Noy Elik dinha ra maglibot-libot sa poblasyon sa lungsod dayon balik sa sentro sa Sta. Monica.
USA ka sayong gabii sa tubaan ni Nang Elyang, biyudang way anak, nagkapundok ang pipila ka tawo sa tayakan nga kawayan sa gawas sa tindahan. Dinhay nanag-inom og bahalina nga gisambogan og kola. Ilang gihisgotan ang umaabot nga lumba sa bisikleta.
“Morag pildehon na ni Meloy si Estong ning higayona,” matod ni Nong Epren, usa ka hamtong, human yaroka ang usa ka basong bahalina nga gitagay kaniya ni Arsok, usa ka batan-on nga katalirongan ni Meloy.
“Nganong nakaingon ka ana, Nong Epren?” ni Arsok nga midawat sa basiyong baso.
“Maglisod pa og pilde si Meloy ug si Bartolo kang Ingko, uy!” timang ni Pasyo, laing batan-on nga midawat sa tagay ni Arsok.
“Hunahunaa ra god ninyo,” ni Nong Epren nga miirag sa iyang gilingkorang silya. “Si Estong edaran na. Si Meloy batan-on pa ug kursonada. Si Estong, bisan higala mi, angay nang mopahuway aron hatagan og higayon ang mga batan-on sama kang Meloy ug Bartolo.”
“Pero di nato angay hikalimtan si Noy Elik,” ni Pasyo. “Siya ang midaog sa ikatulong dapit sa miaging tuig, sunod ni Meloy.”
“Para nako, si Estong gihapon ang modaog karong pistaha,” sagbat ni Nang Elyang nga mitunol sa sigarilyo nga gipangayo ni Arsok.
“Maglisod na lagi sila si Estong ug Elik pagdaog karon,” ni Nong Epren pa. “Sa ilang praktis, gilatas na nilang Meloy ug Bartolo ang ruta sa lumba. Si Estong ug si Elik didto ra sa poblasyon maglibot-libot dayong balik dinhi sa ato.”
“Na, tan-awon ta na lang unya sa pista kon kinsa gyoy modaog,” ni Iyo Igme, usa ka gulangon ug tambokong lalaki nga didto maglingkod sa kilid sa tindahan. “Bi, Arsok, tagayi ko. Mag-inom na lang ta.”
“Maayo ini, magpustaanay ta,” gikan kang Nong Epren nga nanghagit. “Adto ko pusta kang Meloy. Kinsay mosukol?”
“Ako, pustaan ko si Estong,” matod ni Nang Elyang. “Pilay imong pusta, Epren?”
“Kinyentos pesos!” ni Nong Epren.
“Ipuno ang akong usa ka gatos, Noy Epren,” ni Arsok.
Diha usay namusta pabor kang Meloy ug mikabat og usa ka libo ka pesos tanan. Si Pasyo nga nagduhaduha wala moapil sa pustaanay. Gidawat ni Manang Elyang ang pusta nilang Nong Epren.
USA ka buntag niana sa adlaw nga Biyernes samtang nagpraktis si Ingko Estong libot-libot sa poblasyon, nakit-an niya si Meloy nga nagpadagan sab sa iyang bisikleta tungod sa munisipyo. Hinay ang dagan sa bisikleta niini. Nakasabot siya nga gikan nga nagpraktis si Meloy, tingali gikan sa habagatan ug mopauliay na kini ngadto sa Sta. Monica. Paingon na usab nga mopauli si Ingko Estong. Gipakusgan niya ang pagtindak sa pedal sa iyang bisikleta aron makaagpas kang Meloy. Si Meloy usa ka traysikad drayber. Ang traysikad usa ka easy rider kun bisikletang gamay nga gipahaoman og side car sama sa traysikol nga de motor. Gigamit kining pasaheroan sa dug-ol nga distansiya lamang. Ang bisikleta nga gisakyan karon ni Meloy usa ka racer nga sama sa mga bisikleta sa mga mangapilay sa lumba.
“Andam ka na ba, Undo, sa atong lumba karong Domingo? Bisperas na ra ba ugma,” matod ni Ingko Estong nga milingi kang Meloy dihang nagkatupad na ang duha ka bisikleta nga hinay nga nagdagan.
Mitan-aw si Meloy kang Ingko Estong. “Andam na kaayo, Ingko, uy! Ikaw, andam na? Dinhi ka ra man god maglibot-libot sa poblasyon.”
“Andam na pod.” Mingisi si Ingko Estong.
“Pildehon ka gyod nako, Ingko. Mao nga manikaysikay ka gyod nga di ka luiban sa imong mga lutahan,” prangka ni Meloy nga mikisdom ang nawong. Napikon siya kay daw nabatyagan niya nga siniaw ang pakigkukabildo sa hamtong kaniya.
“Suwayi lang, Undo. Ipakita imong katag. Nahinumdom ka pa ba nga sa miaging tuig naapsan tika dihang mga usa na lang ka milya ang distansiya nato ngadto sa finish line?”
“Ako man gyod unta ang modaog adto ba! Nagsige man god kog lingi ninyong nagsunod nako. Labi na gyod kang Noy Elik ug kang Bartolo nga duol dang nagsunod kanimo. Ako na lang namatngonan nga misatong ka lagpas nako. Kompiyansa da gyod ko. Wa koy gireserbang hangin para sa kataposang hunat. Apan karong higayona paretirohon ta mong duha si Noy Elik!” Gipalambi ni Meloy ang iyang mga ngabil.
Nahimuot sa hilom si Ingko Estong sa gipamulong sa batan-on. “Mao na, Undo, ang giingon sa Kinatsila, ‘La comfianza mata el hombre!’ nga buot ipasabot sa Binisaya, ang kompiyansa makamatay kaniya.”
“Sus, kataas pa nimog diskurso, Ingko! Kitaon na lang nato atong katag karong Domingo. Seguro kong mamunbon ka… kamong duha si Noy Elik!” Ug gitindakan ni Meloy ang pedal sa iyang bisikletang iglulumba ug misutoy kini paingon sa merkado sa lungsod nga maagian padulong sa Sta. Monica.
SABADO sa gabii. Bisperas sa pista. Human niya maandam ang iyang bisikleta nga gikandadohan niya sa suwambi sa silong sa iyang balay, milakaw si Ingko Estong paingon sa tubaan ni Nang Elyang aron makigkabildo sa iyang mga higala sama ni Nong Epren ug sa mga batan-on nga sila si Arsok ug Pasyo. Nahilabay siya sa gamayng balay ni Meloy kay maagian man ni niya paingon sa tubaan. Nabatian niya nga nag-estoryahanay si Meloy ug ang iyang asawa nga si Nita. Mihubong siya ug mipahipi sampig sa kasilyas sa balay aron mangusisa. Di baya siya usisero, apan karon, daw ang iyang diwa nag-aghat kaniya sa pagpaniid.
“Meloy, sunod semana moanak na ko ning ikaduha nato nga dia sa akong tiyan,” tingog ni Nita. “Wa ra ba gyod tay tinigom para ini!”
“Sige lang, Nits. Ugma, modaog lagi ko sa lumba,” tingog ni Meloy nga masaligon. “Dag-on ko nang diyes mil pesos nga unang ganti. O di ba, ang ikaduha nga siyete mil. Kon demalason pa gyod, nagtangag man pod og singko mil ang ikatulo.”
“Di ra ba kuno maayong maneguro sa usa ka sugal, kay kalagmitan ang maneguro, mapilde,” ni Nita.
“Di man sugal ang lumba sa bisikleta, Nits. Duwa man ni sa abilidad ug katakos. Mao nga ayaw lag kabalaka.”
“Apan naa si Ingko Estong. Naa pod sila si Noy Elik ug si Bartolo. Pulos sila lig-on mong kaparang.”
“Si Ingko Estong ug si Noy Elik mga gurang na. Di na kaayo lig-on ang ilang tuhod. Si Bartolo ang bantayanan kay ambas-ambas mi sa among praktis.”
“Unya uroy, simbakog di ka makadaog bisan sa ikaduha ug ikatulong ganti,” ni Nita, “asa man ta manguhag kuwarta nga igasto sa akong pagpanganak? Wa ra bay kita ang atong traysikad sukad ka magsugod og praktis. Maihap lang sa tudlo ang miabang niini ning nangaging mga adlaw… kay hapit god tanan dinhi sa ato nga namasada og traysikad ila mang kaugalingon ang traysikad.”
“Di tingali na mahitabo nga wa koy madag-an, uy!” mitaas ang tingog ni Meloy. “Apan kon mahitabo na, wa tay laing mahimo… manghuwam ta sa Turko bisan five-six.”
Wala nay nabati si Ingko Estong gikan kang Nita. Apan milakdop sa iyang panumdoman ang usa ka hitabo nga di niya mahikalimtan; kadtong gipanganak ni Matilda, iyang asawa, si Dayana. Naglisod pagpanganak ang iyang asawa tungod sa kadako sa bata sa iyang tiyan ug naglisod pag-agi sa agianan. Si Iya Angkot, ang mananabang sa ilang dapit, misugyot nga kinahanglan dad-on gyod si Matilda sa Southern Islands, ospital nga nahimutang didto sa Dakbayan sa Sugbo, aron ipaubos sa caesarian operation. Naproblema siya bahin sa kasakyan niini kay tunga-tunga na kadto sa kagabhion ug wa pay biyahe sa mga trak-pasaheroan ug ang first trip moagi niana pang alas dos sa kaadlawon. Dihay nakasulti nga si Ardabo nahiuli gikan sa dakbayan ug dala niini ang awto sa iyang amo. Gihangyo ni Ingko Estong si Ardabo kon mahimo ba nga mahatod si Matilda sa Southern Islans. Misugot si Ardabo kay mouliay sab siya inigkabuntag ngadto sa dakbayan ug mahimo nga mosayo na lang siya. Si Ardabo amahan ni Nita. Human manganak si Matilda, dako kaayo ang iyang pasalamat kang Ardabo. “May dako kong utang kabubut-on nimo, Bay Dabong!” Miagbay kaniya si Ardabo. “Way sapayan, Bay Estong. May higayon da ang pagbawos sa utang kabubut-on nga di kabayrag sapi.”
DOMINGO. Pista na! Alegre nga mitugtog sa usa ka martsa ang banda sa Sta. Monica National High School. May mabulokong mga banting ug nagkadaiyang mga diyandi kun dayan-dayan ang kabalayan labi na kadtong anaa sa daplin sa karsada. Daghan nang mga tawo ang nagpundok sa plasa sa sentro sa Sta. Monica. May nagpunsisok sa mga siklista nga mangapil sa lumba. Baynte sila ka buok. Nanagsul-ob silag T-shirt ug short pant nga nagkalidades ang kolor. Kadaghanan nila gura lang ang gikawo. May pipila ka buok nga nagsul-ob og crash helmet lakip na nilang Ingko Estong, Noy Elik, Meloy ug Bartolo. Ang ilang mga dumadapig nag-iyahay pag-alirong sa ilang mga idolo. Ang ubang mga lumulupyo nga wa mangadto sa sentro apan buot mosaksi sa lumba dinha lamang sa kadaplinan sa karsada nga agian sa lumba maghulat. Wala nila baliha ang kainit sa Adlaw sa kabuntagon.
Nasiplatan ni Ingko Estong si Meloy nga nakig-estorya kang Nita. Dako na tuod ang tiyan ni Nita nga sa iyang banabana umaanak kini karong bulana.
“Bay Estong, daw may lawom kang gihunahuna da!” timbaya ni Noy Elik nga nagaguyod sa iyang bisikleta.
“Ay, wa man, Bay Elik,” matod ni Ingko Estong. “Nus-a man diay sugdan ang lumba? Hapit nang alas otso ug nagkainit na ang Adlaw.”
“Nia na to ron si Moring, ang tsirman sa lumba,” ni Noy Elik. “Tingali magsugod ta karong alas nuybe.”
Paghiabot ni Moring uban sa iyang mga sakop sa komite sa lumba sa bisikleta, mihatag siyag mga pahinumdom bahin sa lagda sa lumba. Diha sa iyang kiliran si Sir Fredo, maestro sa hayskol, nga maoy official timer sa lumba.
Gipalinya na ang mga entrante uban sa ilang mga bisikleta. Nagtupad sila si Ingko Estong ug si Noy Elik sa tuo nga bahin sa linya. Didto sa wala, nagtupad pod sila si Meloy ug si Bartolo. Unya, gipataas ni Moring ang rebolber nga iyang gikuptan ug gikablit.
Bang!
Nag-iyahay pagtindak ang mga siklista sa mga pedal sa ilang mga bisikleta. May pipila nga misutoy dayon paingon sa norte.
Nag-abiba ang mga tawo nga diha sa ruta sa lumba. May naninggit sa mga ngalan nilang Ingko Estong ug Noy Elik. Ang mga batan-on misiyaok sab sa mga ngalan nilang Meloy ug Bartolo nga maoy ilang paborito.
Nag-una si Ingko Estong samtang nagpaingon pa sila sa norte. Nagsunod kaniya, dili kaayo layo, si Meloy. Nagsunod kang Meloy si Bartolo, dayon si Noy Elik uban ang tulo pa ka batan-on. Apan sa pagbalik na nila paingon sa habagatang bahin sa lungsod, naapsan ni Meloy si Ingko Estong. Hinuon, wala magpalayo si Ingko Estong kang Meloy. Gibanabana niya nga dili siya hibiyaan og layo nga distansiya ni Meloy nga way lingi-linging mipahaguros sa iyang bisikleta. Nahiagian na nila ang sentro sa Sta. Monica paingon sa kataposang barangay nga sakop sa lungsod. Giabibahan pag-ayo sa iyang dumadapig si Meloy. Daghan sab sa mga gurang ang naninggit dapig kang Ingko Estong.
Sa kataposang lap gikan sa habagatan, sikit kaayo sila si Ingko Estong ug si Meloy. Anhi na dinhi makita ang ilang katag paingon sa finish line didto sa plasa sa sentro sa Sta. Monica. May hangin nga gipundo si Ingko Estong alang ning hugnaa. Paspas niyang gitindakan ang mga pedal sa iyang bisikleta. Misutoy kini lagpas kang Meloy nga way lingi-lingi kinsay nagsunod kaniya. Misiga ang mga mata ni Meloy nga naapsan ni Ingko Estong. Paspas pod niyang gitindakan ang mga pedal sa iyang bisikleta. Nagpuli-puli silang duha sa pag-una. Karong higayona, si Ingko Estong maoy nag-una. Unya gukdon siya ni Meloy ug maapsan. Dayon si Ingko Estong na man ang moagpas kang Meloy. Pulos sila nagkadusingot tungod sa naglagiting nga kainit sa Adlaw paingon sa kaudtohon; ang ilang mga T-shirt ug purol nangahumod na tungod sa singot nga miawas sa ilang kalawasan. Hangtod nga duol na sila sa Sta. Cruz, barangay nga kasikbit sa Sta. Monica habig sa habagatan. Nag-una na si Meloy samtang si Ingko Estong nagsunod, kanunay nga naghulga sa kadaogan sa batan-on. Karon, nabiyaan gyod og layo-layo si Ingko Estong.
Unya nalantawan ni Ingko Estong nga kalit nga misaliring ang bisikleta ni Meloy sa usa ka awaaw nga dapit. Mikawas si Meloy. Pipila pa ka gutling, naagian siya ni Ingko Estong nga kusog kaayong nagpanindak sa pedal sa iyang bisikleta.
“Wa na. Di na kapugngan. Si Ingko Estong gihapon ang modaog!” tagawtaw ni Meloy sa iyang kaugalingon dayong panaguto ug panglingo. Di mahimong iyang pugson ang pagpadagan sa bisikleta kay gawas nga madaot ang yantas, hinay na ning modagan kay mibuto man ang usa ka ligid. Wa na siyay mahimo gawas sa pag-angkon sa kapildehan. Nabatyagan niya nga nanghalang ang iyang mga mata. Naglagot siya sa iyang bisikleta. Gipatiran niya kini.
Sa laing bahin, misantop sa hunahuna ni Ingko Estong nga may daotan gyong nahitabo kang Meloy kay nganong misaliring man ang bisikleta niini. Basin gikuyapan ang batan-on o di ba kaha may kabilinggan ang bisikleta niini. Tingali naputol ang kadena. Kalit kaayo ang iyang hukom. Balikon niya si Meloy. Naabtan niya kini nga nag-abay na lang sa bisikleta.
“Unsay nahitabo, Undo?” sukot dayon ni Ingko Estong.
“Mibuto ang ligid, Ingko,” tubag ni Meloy ug mahibulongon nga misumbalik, “Uy, nganong mibalik ka god, Ingko?”
Milantaw si Ingko Estong sa unahan sa karsada nga ila nang naagian. Nagsingabot na ang pundok nilang Noy Elik ug Bartolo.
“Undo, wa tay usikang panahon. Gamita ning akong bisikleta. Dia na sila si Elik ug Bartolo!” ni Ingko Estong.
“Apan ikaw, Ingko?” ni Meloy.
“Ako na lay dala anang imong bisikleta. Isakay ko nig traysikol.”
Unya nabati nila ang hinaguros sa daghang mga ligid nga milabay kanila.
“Pero, Ingko…!”
“Sige na. Pagdali! Maapsan pa nimo sila. Hinumdomi nga talianak si Nita sunod semana!” matod ni Ingko Estong.
Sa pagkadungog ni Meloy sa ngalan sa iyang asawa, dali niyang gigabling ang bisikleta ni Ingko Estong ug miayre. Paspas siyang mitindak. Kamas gyod taman sa ginhawa hangtod diha na siya sa ikog sa panon nilang Bartolo. Duol na lang ang Sta. Monica. Pipila na lang ka gutlo moabot na sila sa sentro niini. Miutong si Meloy. Hinurot ang tanang kusog ug hangin nga nahibilin kaniya gipasutoy niya ang bisikleta lagpas sa panon sa mga batan-on nga nagsunod nilang Noy Elik ug Bartolo nga sikit kaayong nag-ilog sa dalan.
Nakita ni Meloy nga nag-una na si Bartolo. Gipaninguha niya nga maapsan si Noy Elik. Nadungog niya ang sibaw nga singgit sa mga tawo. “Paspas, Bartolo!” Diha poy naniyagit. “Gukod, Noy Elik!”
“Si Meloy! Si Meloy! Naapsan ni Meloy si Noy Elik! Sikad, Meloy!” Mikulikot sa iyang pandungog ang singgit sa iyang mga dumadapig.
Sa unahan, daw nakita na ni Meloy ang pulang ribbon sa finish line. Nakasikit na siya kang Bartolo nga milingi kaniya. Ang mga tawo nga naglaray sa isigkadaplin sa karsada nagpaninggit sa ilang mga ngalan. “Bartolo! Meloy!”
Miutong si Meloy. Misikad sa pedal nga daw gigukod ni Kamatayon. Ug misatong ang iyang bisikleta lagpas kang Bartolo hangtod nga nahisangko kini sa finish line. Unya natumba ang bisikleta ni Meloy. Nawad-an siya sa panimuot. Dali siyang gitabang ni Dr. Alcantara ug sa usa ka nars nga sakop sa first aid committee.
Dihang naulian na sa maayong panimuot si Meloy, gihatag na ang mga ganti ngadto sa mga mananaog sa lumba. Si Noy Elik maoy nakakuha sa ikatulong ganti, sama sa miaging tuig. Si Bartolo midawat sa ikaduhang ganti. Ug si Meloy mao gyod ang nakailok sa unang ganti lakip ang usa ka dakong tropeyo nga gidonar gihapon ni Mayor Anas Dikan.
Wa makadaog si Ingko Estong. Apan human madawat ni Meloy ang iyang ganti, gipangita niya si Ingko Estong ug gitunol ang tropeyo.
“Imo na ni, Ingko,” ni Meloy nga nagpahiyom. “Ikaw ang tinuod nga mananaog ning lumbaa.”
Gidawat ni Ingko Estong ang tropeyo ug gihapuhap, dayon gitunol pagbalik kang Meloy.
“Imoha kini, Undo,” matod ni Ingko Estong. “Kon wa pa mobuto ang imong ligid, ikaw man gyod ang modaog.”
“Apan nasakripisyo ka, Ingko! Ikaw man ang nagsunod nako sa wa pa mobuto ang akong ligid. Nagtuo man gani ko nga ako maapsan pa nimo bisan og wa pa mobuto akong ligid.”
“Na, ayna lang nag hunahunaa,” ni Ingko Estong nga miagbay kang Meloy. “Ang importante, duna ka nay salapi nga magamit inigpanganak ni Nita.”
“Meloy!” may babayeng mitawag kang Meloy. Si Nita.
Nagpasalamat si Meloy kang Ingko Estong, ug giduol si Nita nga malipayon kaayong midawat sa tropeyo nga gihatag ni Meloy.
(KATAPOSAN)
No comments:
Post a Comment